Naixe “Agora por l’aragonés”, pa potenciar l’uso d’a luenga

O programa busca a creyación d'un ret de colaboradors en o qual interpresas, institucions y particulars s'impliquen por a supervivencia de l'aragonés

0
446
visitas
López Susín, director d'a Dirección Cheneral de Politica Lingüistica
López Susín, director d'a Dirección Cheneral de Politica Lingüistica
- Publicidat -

O Gubierno d’Aragón, a traviés d’o Departamento d’Educación, Cultura y Esporte, ofreixe dende hue o programa “Agora por l’aragonés” u “Ara per l’aragonés” dirixiu a personas, asociacions, comercios, interpresas, profesionals y institucions que deseyen conoixer a luenga aragonesa, aprender-la y difundir a suya practica. Una iniciativa que tracta de potenciar l’uso de l’aragonés y difundir a suya riqueza lingüistica, y creyar un ret de colaboradors que participen en a suya difusión y s’impliquen por a suya supervivencia.

Para o director cheneral de Politica Lingüistica, Ignacio López Susín, “Agora por l’aragonés” “ye un programa de socialización d’a luenga” con o qual se pretende quitar l’aragonés de l’ambito domestico pa que sía utilizau en a vida social y comercial de forma normal. Y lo fa a traviés de quatro patas fundamentals: as personas que aman u charran a luenga; as asociacions que treballan por ella; as interpresas y comercios que la usan, sisquiera sía de forma simbolica; y as institucions que represientan a os ciudadans y a las qualas as leis les encomiendan o quefer de veilar por o patrimonio”.

O carné

Carné "Agora por l'aragonés"
Carné “Agora por l’aragonés”

O programa va, amás, asociau a un carné que, seguntes ha subrayau López Susín, “forma parte d’una ideya de conscienciación, un elemento material que faiga sentir a la ciudadanía perteneixer a una comunidat, en iste caso a una comunidat de personas que charran l’aragonés u simplament que l’aman porque ye parte d’o nuestro patrimonio immaterial”.

A traviés d’iste carné qui s’inscriban tendrán acceso, en primer puesto, a l’aprendizache no formal d’a luenga aragonesa, a traviés d’as asociacions culturals y, en segundo puesto, a las diferents avantallas que as entidatz, establimientos, interpresas y profesionals colaboradors les ofreixcan y que disposarán d’un distintivo oficial d’o prochecto para transmitir a o suyo publico a suya implicación en o prochecto, tal como ha explicau López Susín.

Visualizar a luenga, practicar-la, asociar-la a l’actividat comercial, creyar vinclos entre interpresas y consumidors, incorporar-la de forma normal a las actividatz que realicen as institucions, istos son beluns d’os obchectivos d’iste programa que s’ha presentau hue en o IAACC Pablo Serrano de Zaragoza en un acto que ha estau amenizau por María José Hernández, qui ha deleitau a o publico asistent con quantas cantas en aragonés.

Si has trobau errors d’escritura u gramaticals, por favor notifica-nos-lo seleccionando o texto y pretando Ctrl+Enter.

- Publicidat -