Hackean Pordede y furtan os datos d’os suyos usuarios

A plataforma de cintas y series ha sufierto un ataque en a base de datos que almagazenaba información sobre os suyos usuarios. Dende Pordede recomiendan cambiar a clau d'aquells servicios en os quals tamién s'utilizaba a mesma clau d'acceso.

0
167
visitas
Pordede
Pordede
- Publicidat -

Pordede, a plataforma online para veyer series y cintas, ha anunciau que as suyas bases de datos han estau hackeadas y que os atacants han puesto obtener información d’os suyos usuarios. Por ixo, dende a pachina recomiendan cambiar a clau d’aquells servicios, como que email u retz socials, en os quals tamién s’utilizaba a mesma clau d’acceso.

De momento no se conoixen masiaus detalles sobre a autoría ni as conseqüencias de l’ataque. Como que publica Pordede en Twitter, “somos treballando para veyer cómo y si podemos recuperar-nos d’iste truco, nunca hebanos sufierto un ataque asinas, desconoixemos l’autor”.

Asinasmesmo, a plataforma tamién alerta de phishing, webs falsas que se son fendo pasar por Pordede para recopilar información sobre os usuarios y posteriorment vender ditos datos en o ret. Asinas, a pachina advierte sobre correus que se faigan pasar por oficials para sonsacar claus.

Dimpués d’a reforma d’a Lei de Propiedat Intelectual aprebada en noviembre de 2014, portaladas de conteniu como que Series.ly u Series Pepito deixoron d’existir pa privar sancions de dica 600.000 euros. Seguntes comunicoron os administradors de Series.ly, dica alavez os encargaus d’a web no yeran responsable d’o conteniu y de si iste violaba dreitos d’autor. Manimenos, ixo cambió.

Poco dimpués d’o zarre d’a competencia, Agustín Pardo creyó a portalada Pordede, plataforma que trobó una traza de burlar a Lei de Propiedat Intelectual: alochar os suyos servidors y vinclos difuera d’Espanya, an no existe dita lechislación. Como que reflectan en Alexa, Pordede s’ha convertiu una d’as 100 pachinas mas visitadas d’Espanya.

Dende alavez, a web de Pordede ha sufierto momentanias caitas quan os suyos servidors no podeban endurar bell volumen d’usuarios y, cada vegada que isto ocurriba, as remors sobre a suya zarre se disparaban. Isto tamién ocurrió o 4 de chulio, quan dende Twitter intentaban tranquilizar afirmando que ” Pordede ye y sera http:// pordede.com, somos treballando para tornar a dar servicio como que siempre, gracias por a vuestra infinita paciencia”. Manimenos, como que poco dimpués revelarían, se tractaba d’unatra coseta: o mayor hackeo d’a suya historia.

Por agora, a web sigue inaccesible. Os suyos responsables siguen treballando para recuperar-la y asegurar as claus d’os suyos usuarios frent a posibles nuevos ataques. Mientres, dica nuevo aviso, contina a incertidumbre sobre qué cantidat de datos s’han filtrau.

Si has trobau errors d’escritura u gramaticals, por favor notifica-nos-lo seleccionando o texto y pretando Ctrl+Enter.

- Publicidat -