Google sabe os datos d’1,6 millons de pacients britanicos de forma ilegal

Un informe d'a Oficina d'a Comisión d'Información d'o Reino Uniu concluye que l'alcuerdo entre DeepMind y os hespitals d'a sanidat publica no cumplió a lei de protección de datos.

0
142
visitas
Streams, l'app de Google.
Streams, l'app de Google.
- Publicidat -

L’alcuerdo de colaboración entre os hespitals d’a sanidat publica britanica (NHS por as suyas siglas en anglés) y DeepMind “incumplió a lei de protección de datos”. A frase forma parte d’un informe que sinya Elizabeth Denham, presidenta d’a Oficina d’a Comisión d’Información d’o Reino Uniu (ICO por as suyas siglas en anglés). L’ente publico, que responde directament debant d’o Parlamento, ha iniciau una investigación que ha durau mas d’un anyo en a quala ha trobau quantos “defectos”.

Os fallos han ocurriu en a traza en a quala os datos estioron maniaus por a subsidiaria de Google. Denham y o suyo equipo tamién creyen que 1,6 millons de pacients no fuoron debidament informaus sobre l’uso que se le iba a dar a os suyos historials medicos.

Os hespitals d’o NHS forman en Reino Uniu un sistema semellant a la nuestra Seguranza Social. Son os mesmos que en mayo estioron atacaus por WannaCry. Dependendo d’a localización y d’o centro, os pacients pueden optar a una gama mas u menos amplia de servicios. Por a suya parte, DeepMind, que le costó a Google 400 millons de dolars fa tres anyos, se dedica a o desembolique de sistemas de aprendizache automatico y a la intelichencia artificial.

Son socios dende setiembre de 2015, quan sinyoron un contracto pa compartir os historials medicos de quantos centros. Os hespitals meteban os datos y DeepMind, a tecnolochía: a fin zaguera yera desembolicar Streams, una app pa monitorizar a os enfermos de rinyón adscritos a o NHS. Ixo ocurrió exactament siet meses dimpués que a revista New Scientist publicase que, gracias a l’alcuerdo, Google teneba acceso a os datos d’1,6 millons de pacients britanicos. A multinacional se limitó a decir que a posesión d’ixos historials yera necesaria pa o suyo cometiu.

“Habioron de y podioron haber estau mas transparents”

“O pre d’a innovación no ha d’estar o que erosione os dreitos fundamentals a la privacidat”, explica a comisaria d’o ICO en a investigación. Garra d’os pacients dio o suyo consentimiento pa que os suyos datos isen procesaus por DeepMind porque dengún les preguntó si quereban fer-lo. A día de hue, Google sabe quáls d’ells han sufierto trastornos psicolochicos, si tienen VIH u no, quántos acuden regularment a o cardiologo u si s’han trencau una garra u un brazo en os zaguers cinco anyos.

En o contracto, de ueito pachinas, se detallaba o tractamiento d’os datos, o metodo pa transferir-los, o puesto an se guardarían y sobre quí recayerían as responsabilidatz d’o proceso (Google). Tamién s’especificaba que DeepMind no podría tener acceso a os datos privaus d’os pacients ni utilizar garra intelichencia artificial u sistema de machine learning pa procesar-los. Dos anyos dimpués, l’ICO concluye que garra d’as partes cumplió l’alcuerdo.

Paralelament, a multinacional mantiene a lo menos atros dos alcuerdos con mas hespitals d’o Reino Uniu: un pa tractar as malotías oculars y unatro pa o tractamiento d’o cancer. En noviembre de l’anyo pasau, l’IA de Google aconsiguió predecir a ceguera en pacients diabeticos, encara que poco se sabe d’o zaguer.

“O Trust (de NHS) habió de y podió haber estau mas transparent con os suyos pacients y con o que yera pasando”, contina o observatorio. DeepMind y o NHS han respondiu a l’informe decindo que os pacients dioron o suyo “consentimiento implicito” pa compartir a información; ya que, quan Streams estase rematau, se beneficiarían d’una “atención sanitaria directa”. Seguntes l’ICO, l’alcuerdo entre as dos partes no compliba d’o tot a Data Protection Act (a lei de protección de datos).

Qué le pide o ICO a la Seguranza Social britanica?

“Hemos pediu a o Trust que faiga quantos cambios que subsanen os defectos, asinas que a suya cooperación ye bienvenida. A Lei de Protección de Datos no ye una barrera pa la innovación pero cal estar tenida en cuenta allá an os datos d’a chent sían estando usaus”. Entre as peticions se troban “establir as bases legals apropiadas baixo a Lei de Protección de Datos pa este y os alcuerdos futuros”, “determinar cómo complirá o suyo deber confidencialidat con os pacients en os acuerdos futuros que impliquen datos personals”, “completar una avaluación d’o impacto sobre a privacidat, incluindo os pasos especificos pa asegurar a transparencia” y “comisionar una *auditoría que os suyos resultaus serán compartius con l’ICO”.

Por a suya parte, DeepMind asume haber cometiu quantas errors en l’alcuerdo orichinal (que estió renovau automaticament quan anuncioron Streams) y reconoixe que deberían haber explicau o contracto a o publico y a os pacients: “Subestimamos a complexidat d’o NHS y d’as leis arredol d’os datos de pacients”, diz a companyía subsidiaria de Google.

Si has trobau errors d’escritura u gramaticals, por favor notifica-nos-lo seleccionando o texto y pretando Ctrl+Enter.

- Publicidat -