O Gubierno imposa a la Generalitat un control de gastos semanal pa impedir pagos pa o referéndum

Os cargos con responsabilidat economica y financiera de l'Administración autonomica serán obligaus a informar semanalment a o ministerio de Ficienda d'as partidas de gasto aprebadas por la Generalitat catalana. Caso que l'Executivo de Carles Puigdemot desobedeixca l'alcuerdo adoptau por a Comisión Delegada d'o Gubierno pa Afers Economicos deixaría de recibir o Fondo de Liquididat Autonomica (FLA).

0
47
visitas
Méndez de Vigo, Ministro d'Educación y portavoz d'o gubierno.
Méndez de Vigo, Ministro d'Educación y portavoz d'o gubierno.
- Publicidat -

O Executivo de Mariano Rajoy aumenta o control sobre as actuacions d’o Gubierno de Carles Puigdemont. A Comisión Delegada d’o Gubierno pa Afers Economicos ha aprebau iste viernes un alcuerdo por o qual obliga a la Generalitat de Catalunya a informar semanalment sobre os expedients encetaus u tramitaus de pago para privar que s’apreben gastos relacions con o referéndum de l’1 d’octubre. A información habrá d’estar remitida a o Ministerio de Ficienda.

O ministro d’Educación y portavoz d’o Gubierno, Íñigo Méndez de Vigo, ha explicau que caso que l’Administración catalana no dé información cada semana sobre as partidas de gasto podrían deixar de recibir o Fondo de Liquididat Autonomica (FLA).

Méndez de Vigo ha recordau que la Generalitat ha recibiu mas de 67.000 millons d’euros dende a enchegada d’iste mecanismo de financiamiento y que pa 2017 Catalunya podría cobrar uns 3.600 millons. “A dentrada en vigor d’iste alcuerdo ye immediata. Será o ministerio de Ficienda l’encargau de veilar por o suyo complimiento”, ha explicau o ministro portavoz.

Os funcionarios que son suchetos a ista obligación son “os interventors d’as consellerías, os responsables economico-financiers d’os organismos y entidatz de l’administración catalana, o director cheneral de Presupuestos y o director cheneral de Politica Financiera, Seguranzas y Tesoro”.

Méndez de Vigo no querió dentrar en “as posibles sancions” que podría carriar pa os funcionarios “negar a información u a falta de sinyatura en bella partida de gasto” pero fació “una gritada a la *cordura” pa que “os diners se dedique a guarenciar os servicios publicos y en esfensa de l’intrés cheneral” y no para “un *referéndum que ye ilegal”.

A exichencia de l’Executivo central con ista “actuación preventiva”, como que a clamó o portavoz d’o Gubierno, responde a la nueva estratechia de secretismo que s’imposó la Generalitat dimpués d’o concurso fallido para as urnias, que quedó desierto en a suya primera fase sin que garra interpresa podese formalizar a suya ofierta economica. Por contra, sí que s’han succediu quantos actos simbolicos pero en os quals no s’ha sinyau brenca oficial, como que o compromiso por o referéndum d’os altos*cargos d’abril u l’acto en o TNC de fa dos semanas.

A normativa aprebada por a Comisión Delegada d’o Gubierno para Afers Economicos tamién ye un posicionamiento paralelo a la resolución d’o Tribunal Constitucional que admitiba a tramite a denuncia o recurso d’o Gubierno a os presupuestos catalans contra a parte d’os presupuestos de la Generalitat para 2017 que incluiban partidas para a convocatoria d’un referéndum d’independencia.

A suspensión dictada por o TC y o recurso d’o Gubierno afectan a la disposición adicional 40, que replega a convocatoria d’un referéndum, y a tres partidas presupuestarias que suman 5,8 millons y que fan referencia a “procesos electorals y consultas populars” y a “procesos de participación ciudadana”.

Si has trobau errors d’escritura u gramaticals, por favor notifica-nos-lo seleccionando o texto y pretando Ctrl+Enter.

- Publicidat -