Educación implanta un nuevo modelo de bilingüismo en Aragón con un 35% d’horas de luenga extranchera y selección flexible d’asignaturas

Prencipiará en setiembre en ueito colechios publicos d'a Comunidat, que pasarán a denominar-se Centros Brit Aragón, y o Departamento lo implantará de forma progresiva.

0
67
visitas
A consellera d'Educación, Cultura y Esporte, Mayte Pérez, presienta o nuevo modelo de bilingüismo d'Aragón, que prencipiará a implantar-se en setiembre en centros publicos d'a Comunidat.
A consellera d'Educación, Cultura y Esporte, Mayte Pérez, presienta o nuevo modelo de bilingüismo d'Aragón, que prencipiará a implantar-se en setiembre en centros publicos d'a Comunidat.
- Publicidat -

O Departamento d’Educación implantará o proximo curso un modelo propio de bilingüismo en ueito centros educativos publicos aragoneses, que suposará que a lo menos un 35% d’a formación será en luenga extranchera y dará mas flexibilidat a os centros para seleccionar as materias impartidas en idiomas.

O Gubierno d’Aragón –a traviés d’a Dirección Cheneral d’Innovación y d’a Inspección Educativa- ha analisau entre os zaguers meses o bilingüismo d’a Comunidat y ha disenyau una nueva formula mas adaptada a las necesidatz d’os centros aragoneses.

Iste modelo de bilingüismo en Aragón persigue afavorir y amillorar o conoixencia preciso d’una luenga extranchera para aconseguir, a la fin d’a escolarización obligatoria, o libel B2 d’o Marco Común Europeu de Referencia para as Luengas (MCERL). Os centros con iste modelo tendrán un sello y denominación de Centro Brit Aragón.

As novedatz d’iste modelo son que a lo menos o 35% d’a formación será en luenga extranchera –en sintonía con l’exichiu en o MECD-British Council- y os centros tendrán mas flexibilidat para trigar as materias que imparten en idiomas. O British Council obliga a que isto se faiga en Sciencias Naturals, Sciencias Socials y Artistica (en plastica, no en mosica). Con o nuevo modelo, os centros podrán trigar –d’alcuerdo a o suyo prochecto educativo y con a finalidat que os alumnos aconsigan os obchectivos en todas as materias- en qué asignaturas imparten a luenga extranchera. Podrán incorporar-la tamién en as actividatz d’o centro, en prochectos europeus que desemboliquen u en actividatz complementarias (no extraescolars). Ye decir, cada colechio u instituto disenyará o suyo itinerario bilingüe.

A o profesorau encargau de dar istas materias en un segundo idioma se le exichirá un libel B2 d’idiomas. Como que novedat, os centros contarán con profesorau que poseiga a lo menos un libel C1, que s’encargará de potenciar a competencia oral d’o alumnau y de coordinar o modelo con a resta d’o profesorau. Con o modelo British Council, o profesorau tiene o libel B2 y i hai colaboradors u auxiliars con libel C1, pero istos no tienen siempre a titulación docent, ya que son un emparo a o profesorau. A metodolochía docent será activa y centrada en l’alumno (a denominada AICLE).

Os centros publicos seleccionaus para iste programa, d’as tres provincias y que incluyen centros tanto rurals como que urbans y tamién de nuevas creyación -totz ells con modelo bilingüe en anglés- son:

  • Violada-Monegros de Tardienta (Uesca)
  • Nuestra Sinyora d’o Pilar de Monreal d’o Campo (Teruel)
  • Ixample (Teruel)
  • Ferrer y Racaj de Exeya d’os Caballers (Zaragoza)
  • Parque Venecia (Zaragoza)
  • Recarte y Ornat (Zaragoza)
  • Valdespartera IV (Zaragoza)
  • Centro Integrau d’a Jota (Zaragoza)

O modelo prencipiará a aplicar-se en as aulas 1º d’Infantil (3 anyos), fueras d’iste de A Jota, ya que en tractar-se d’un centro integrau s’impartirá, amás d’en 1º d’infantil, tamién en 1º d’a Educación Secundaria Obligatoria (ESO). O proposito d’o Departamento ye universalizar ista nueva forma de bilingüismo a traviés d’una encorporación progresiva d’os centros. Entremistanto, se guarenciará a continuidat d’os modelos vichents pa que aquells alumnos que prencipiasen a suya etapa escolar con ells puedan rematar-la. Actualment, 176 centros publicos aragoneses tienen en marcha bell tipo de prochecto de bilingüismo en as suyas aulas /117 d’ells son de Primaria y a resta de Secundaria).

Amás, o modelo de bilingüismo se basa tamién en una formación excelent d’o profesorau, que se leva a cabo a traviés d’o Centro Aragonés de Luengas Extrancheras para a Educación (CARLEE), creyau o pasau anyo para actualizar a metodolochía docent y o aprendizache integrau de contenius y luengas extrancheras. O programa d’o curso pasau constó de 47 actividatz formativas, por a quala pasoron 1.085 profesors, para as que se recibioron mas d’1.600 solicitutz. Entre una d’as funcions prencipals d’o CARLEE, se troba que os docents puedan adquirir los alibeles B2 de francés y anglés y o C1 d’anglés. Un total de 56 profesors aconsiguioron o libel B2 d’anglés y 6 o de francés, mientres que 78 aconsiguioron o C1 d’anglés.

O Departamento d’Educación entiende a innovación educativa como que una linia prioritaria. Y dentro d’ista, apuesta en firme por a competencia lingüistica en luengas extrancheras. Por ista razón, fomenta l’uso d’a comunicación oral y as metodolochías activas para amillorar o aprendizache de luengas. Asinasmesmo, considera positivo aumentar o tiempo de contacto d’o alumnau con a luenga extranchera y a encorporación d’ista dende o comienzo d’a escolarización.

Si has trobau errors d’escritura u gramaticals, por favor notifica-nos-lo seleccionando o texto y pretando Ctrl+Enter.

- Publicidat -