O Gubierno d’Aragón convocará iste mes os premios literarios en aragonés y catalán

Os gualardons Arnal Cavero y Guillem Nicolau recuperan a suya dotación economica.

0
36
visitas
López Susín, director d'a Dirección Cheneral de Politica Lingüistica
López Susín, director d'a Dirección Cheneral de Politica Lingüistica
- Publicidat -

O Departamento d’Educación –a traviés de l’Adreza Cheneral de Politica Lingüistica- convocará iste mes de chulio os premios literarios Arnal Cavero (en aragonés) y Guillem Nicolau (catalán), que recuperan a suya dotación economica y s’achustan a la nueva Lei de Subvencions.

O Gubierno d’Aragón cumple asinas o suyo compromiso de dotar a istos gualardons con 3.000 euros cadagún d’ells y de convocar-los por separau, dimpués que l’anterior Gubierno PP-PAR los chuntara y les retirase a dotación, o que ocasionó que quedase desierto en todas as suyas convocatorias.

A convocatoria se publicará en os proximos diyas en o Boletín Oficial d’Aragón y en ella se replega que as obras habrán d’estar ineditas y tener una extensión minima de 100 pachinas para prosa, 350 versos para poesía y sin limite para asayo. O plazo de presentación d’orichinals prencipiará una vegada publicada a orden en o BOA y acabará a os 20 días naturals.

O director cheneral de Politica Lingüistica, José Ignacio López Susín, recuerda que istos premios son un traste imprescindible para o foment d’a creyación literaria en as nuestras luengas propias. S’enmarcan, asinasmesmo, en as medidas d’o Gubierno d’Aragón pa desembolicar una politica lingüistica para l’aragonés y o catalán realista y adaptada a la normativa vichent y a os compromisos internacionals asumius por o Estau.

López Susín explica que, para poder convocar os premios por separau y con dotación, s’ha habiu de modificar o decreto aprebau por l’anterior Gubierno y achustar os gualardons a la nueva regulación establida por a Lei de Subvencions d’Aragón de 2015, que los considera como tals. Para ixo, i hai habiu que redactar unas bases reguladoras (ORDEN ECD/48/2017, de 10 de chinero, por a quala s’estableixen as bases reguladoras d’os premios de creyación literaria y artistica en aragonés y catalán d’Aragón) y, una vegada aprebaus os presupuestos d’a Comunidat Autonoma s’ha lanzau a convocatoria.

Por unatro costau, o Departamento d’Educación, Cultura y Esporte publicó o viernes l’en Boletín Oficial d’Aragón a convocatoria de las aduyas a entidatz sin animo de lucro para 2017 en materia de politica lingüistica, que tienen una quantía total de 20.000 euros. Ixe mesmo diya, se publicó a convocatoria d’as subvencions a las entidatz locals d’Aragón pa l’anyo 2017 en materia de politica lingüistica. La quantía total d’istas aduyas son 39.000 euros.

Si has trobau errors d’escritura u gramaticals, por favor notifica-nos-lo seleccionando o texto y pretando Ctrl+Enter.

- Publicidat -