Pablo Echenique deixará a suya cadiera en as Cortz d’Aragón “en os proximos días”

“A diferencia d'o que somos veyendo istos días en atras formacions politicas, yo no quiero que a mía actividat parlamentaria condicione l'Asembleya Ciudadana que tenemos en marcha y en a quala Podemos Aragón renovará a suya dirección”, ha subrayau o Secretario Cheneral d'a formación morada en Aragón.

0
133
visitas
Pablo Echenique, foto por Pablo Ibáñez (AraInfo)
Pablo Echenique, foto por Pablo Ibáñez (AraInfo)
- Publicidat -

O Secretario Cheneral de Podemos Aragón, Pablo Echenique, renunciará a la suya cadiera en as Cortz d’Aragón “en os proximos días” para no condicionar a renovación d’a formación morada en Aragón, prevista para finals d’iste mes de setiembre.

Echenique ha anunciau ista decisión en o Consello Ciudadano Territorial de Podemos Aragón d’iste dominche, an ha explicau que dimpués de resultar a segunda persona mas votada en l’Asembleya Ciudadana estatal de Podemos en Vistalegre 2, solament por dezaga de Pablo Iglesias, opta por dedicar-se a tiempo completo a las suyas responsabilidatz como que Secretario d’Organización y Programa d’a formación morada.

Seguntes Echenique, os motivos para prener ista decisión son fundamentalment tres. “Me prengo como que un mandato d’os inscritos de Podemos l’haber recibiu mas de uitanta mil votos en Vistalegre 2. M’apasiona o reto que tiengo por debant como que Secretario d’Organización y Programa en ista nueva y complexa fase. Y Podemos en Aragón se queda en muit buenas mans”, ha asegurau.

“Encara que pueda sonar poco imparcial, o libel que tiene Podemos Aragón lo tiene en pocas partes d’Espanya”, ha resaltau Echenique, que ha recordau que a formación obtenió en iste territorio os millors resultaus de tot o Estau espanyol.

L’encara Secretario Cheneral d’a formación morada en Aragón ha subrayau, respective a o momento trigau para deixar a cadiera, que o motivo fundamental ye no condicionar dende o suyo cargo publico a renovación de Podemos en Aragón. “A diferencia d’o que somos veyendo istos días en atras formacions politicas, yo no quiero que a mía actividat parlamentaria condicione l’Asembleya Ciudadana que tenemos en marcha y en a quala Podemos Aragón renovará a suya dirección”, ha *recalcau Echenique.

“Una vegada que decido no presentar-me a la reelección como que Secretario Cheneral para complir con nuestro reglamento d’incompatibilidatz, o siguient paso lochico ye abandonar a cadiera. Lo contrario sería quitar protagonismo a os nuevos liderazgos que han de construir-se en Podemos Aragón”, ha concluiu Echenique, que ha quiesto resaltar que se siente “enormement orgulloso de lo aconseguiu istos anyos, y agora ye momento de deixar paso con chenerosidat. As cadieras en Podemos no son d’as personas, son d’o prochecto y d’a chent”.

Si has trobau errors d’escritura u gramaticals, por favor notifica-nos-lo seleccionando o texto y pretando Ctrl+Enter.

- Publicidat -