Una directiva de TVE fació plegar a una periodista l’argumentario d’o PP pa fer una noticia sobre Rajoy

O Consello d'Informativos de TVE denuncia que una redactora recibió instruccions pa elaborar a información sobre a suya declaración como que testigo en o caso Gürtel y sinyala como que responsable a la directora de contenius. A periodista asegura que le encargoron fer una pieza sobre atras declaracions de presidents y pa ixo le ninvioron una lista con nombres que coinciden con os quals s'incluiban en l'argumentario. Tres d'as quatre redactoras que participoron en a cobertura no sinyoron as suyas piezas por desalcuerdos con a forma d'informar, replega l'informe.

0
22
visitas
Marta Jaumandreu, presentando o Telediario o pasau 26 de chulio
Marta Jaumandreu, presentando o Telediario o pasau 26 de chulio
- Publicidat -

O Consello d’Informativos de TVE denuncia que una d’as periodistas encargadas de cubrir a declaración de Mariano Rajoy como testigo en o caso Gürtel recibió instruccions d’a dirección d’informativos que coinciden con l’argumentario que o PP distribuyó entre os suyos pa afrontar mediaticament o paso d’o suyo president por l’Audiencia Nacional y que publicó Ok Diario un día dinantes.

L’órgano de representación d’os treballadors encetó una investigación dimpués d’a cobertura que dio a televisión publica a iste día y que ya denuncioron: a declaración solament s’ofrió en directo en a Canal 24H, en garra d’os telediarios se dio contexto sobre qué levó a Rajoy a declarar u qué ye o caso Gürtel y se silencioron en as piezas as protestas ciudadanas contra a corrupción arredol de Sant Fernando d’Henares, an tenió puesto a testificación.

O resultau ye un informe, a o que ha teniu acceso ElDiario.es, que han entregau a o Consello d’Administración y a os portavoces d’a Comisión de Control de RTVE en o Congreso que documenta, seguntes o testimonio d’as propias periodistas, cómo s’entregó a una redactora por orden d’a directora de contenius, Carmen Sastre, un documento que coincidiba “en conteniu y formato (tipo de letra, negretas, subrayaus…) con l’argumentario d’o PP”.

En l’informe, se replegan as explicacions d’a redactora implicada, que asegura que a las 12 d’o maitín le encargoron a pieza de contexto con declaracions d’atros presidents, a sola que se fació antiparte d’a noticia. A profesional asegura que l’encargo plegó tarde y se queixó porque amenesteba mas tiempo.

“Quan me queixo que ista pieza me la heban d’haber encargau con mas tiempo, porque amenesto investigar atros casos, me dicen que ells ya tienen uns quantos. De feito, en o minutau ya han apuntau a González y Suárez y me dan tres fuellas con nombres d’atros presidents extranchers. Quan pregunto d’án ha saliu ixa lista me dicen que se la ha dau Carmen Sastre”, relata a profeisonal, que asegura que comprebó en internet os nombres. “A sorpresa estió que trobé ixa mesma lista (con os mesmos subrayaus, negretas y destacaus) baixo o titol ‘Argumentario d’o PP pa la declaración de Rajoy’. Por tot ixo decidié acullir-me a o mío dreito de no sinyar a pieza”, explica a periodista en unas declaracions replegadas por o Consello d’Informativos.

“Cese immediato” d’a directora de contenius

“Somos debant d’un caso que contrimuestra a utilización partidista ya que queda acreditau que a dirección d’informativos asumió como noticia l’argumentario d’o PP en os telediarios en un intento de minimizar l’aconsiga d’a declaración”, concluye o órgano en l’informe ninviau a o Consello d’Administración. Os representants d’os treballadors reclaman tamién en una nota que han feito publica entre a plantilla o “cese immediato de Carmen Sastre” por istos feitos.

A directiva, que estió mesa a o frent d’o conteniu en a zaguers de 2014, no ha respondiu a las preguntas d’o Consello d’Informativos sobre os feitos relatadus por as treballadoras ninviadas o pasau 21 d’agosto, seguntes se replega en l’informe. Sastre ha pasau por muitos puestos de responsabilidat en TVE, entre ells: ha estau chefa de Nacional u d’Economía, directora de Relacions Institucionals y Defensora d’o Espectador.

Tampoco han dau explicacions a o Consello José Antonio Álvarez Gundín, director d’informativos; ni Álvaro Zancajo, director d’a Canal 24H. A sola directiva que ha contestau a las preguntas de l’órgano ha estau a editora d’o TD2, María Eizaguirre, que esfiende que a noticia “estió obridura tanto en a portiada como en o desembolique d’o telediario” y remarca que “a excepcionalidat” d’a situación “quedó reflectada en o 8 menutos y meyo de bloque informativo”. “Como que siempre o criterio pa elaborar a escaleta estió exclusivament profesional”, zancha en a suya respuesta.

ElDiario.es s’ha meso en contacto con TVE pa incluir a suya versión sobre l’ocurriu pero a corporación ha decidiu no fer “garra declaración”. Manimenos, Gundín sí ha dedicau uns menutos a responder a os periodistas sobre iste afer en a rueda de prensa de presentación d’a nueva temporada de TVE.

“O Consello d’Informativos cumple a suya función. I hai una normativa que contempla a suya existencia y o suyo funcionamiento pero as suyas conclusions no son ni muito menos as mías”, ha dito l’alto cargo, que ha enmarcau dentro d’a “normalidat” y a “necesidat” o cese d’o responsable de La 2 Noticias, José Luis Regalado, tasament quatro días antes d’empecipiar a temporada. “A 2 ye pa chovens y os chovens no son os mesmos que os de fa tres u quatro anyos”, ha chustificau. En o suyo puesto será María José Ramudo, vinculada a TVE dende 1990.

Tres redactoras no sinyoron as piezas

L’informe d’o Consello d’Informativos replega con detalle cómo s’organizó a cobertura d’a declaración d’o president d’o Gubierno y mete en evidencia l’encarranyo de quantas d’as redactoras que treballoron en a cobertura, seguntes o relato que fan ellas mesmas en respuesta a las preguntas d’iste órgano.

A redactora de tribunals, a persona que conoixe o caso Gürtel porque ye a encargada de cubrir ista información, no lo fació o pasau 26 de chulio. “La adchunta de Nacional me comunicó que a dirección heba decidiu que a declaración de Rajoy la iba a cubrir a responsable de presidencia y que yo fería l’emparo en a Canal 24H”, replega l’informe an se plasman as respuestas d’as profesionals. As dos periodistas, aseguran, tresladoron a suya “desalcuerdo” con a decisión a Carmen Sastre, “pero pa ella no yera necesario tener conoixencias d’o chudicio ni contexto pa cubrir a testifical de Rajoy”.

O día 26 de chulio a redactora especializada estió a l’Audiencia Nacional y siguió a declaración dende adintro mientres ninviaba mensaches a la suya companyera, a de presidencia, que yera estase fendo directos, seguntes o relato de todas dos. A primera, que explica que “dica as dos d’a tarde no recibié garra gritada d’a mía aria”, decidió no sinyar a pieza. “A la fin me pidioron que escribise unas codas d’a declaración d’o president d’o Senado Pío García Escudero”, afirma en o testimonio replegau por o Consello.

A quatrena periodista involucrada en a cobertura d’a declaración tampoco querió que o suyo nombre amaneixese en o suyo treballo, en iste caso una información con as reaccions d’os partius. Y asinas queda plasmau en l’informe d’o Consello: “Tanto o chefe d’aria –de Nacional– como que a editora me dicioron que a pieza yera conchunta. […] Yo esfendié que una declaración d’o lider d’a oposición (Pedro Sánchez) en a quala pediba a dimisión d’o president d’o Gubierno mereixeba una cronica propia y expresé o mía desalcuerdo”.

Si has trobau errors d’escritura u gramaticals, por favor notifica-nos-lo seleccionando o texto y pretando Ctrl+Enter.

- Publicidat -