As cheleras d’os Pirineus s’amortan

A puyada d´as temperaturas y a disminución d´as precipitacions en forma de nieu fa que as cheleras pirenencas sigan desfendo-se a tot estrus.

0
29
visitas
Comparación d'as cheleras d'o Maladeta
Comparación d'as cheleras d'o Maladeta

Que ye y como se forma una chelera?

As cheleras son grans masa de chelo que, anque amoniquet, se mueven dau o suyo peso y a fuerza d’a gravedat erosionando, foradando y modelando o paisache. Quan istas masas cheladas han perdiu masa suficient pa deixar de mover-se deixamos de considerar-las cheleras y pasan a estar conchestras cheladas. As cheleras allora no son estaticas, sino que gosan de cambear y evolucionar, y cada vez más rapedo dau a puyada d’as temperaturas de l’actualidat. 

O chelo glacial se fa por acumulación de nieu que cambea a estructura dau a lo peso que fa la nieu por dencima. Allora iste chelo se comporta como una roca metamorfica. En cualsiquies puesto d’o planeta do bi haiga más acumulación de nieu d’a que se regala mientres l’anyo, puede fer-se una chelera. A masa d’as cheleras cambea constantement con variacions de l’orache dentro de un mesmo día, entre estacions y respecto a periodos más luengos como Cambeos Climaticos locals u globals. Istos cambeos ambientals afectan a la cantidat de nieu que se adibe a la chelera asinas como a la nieu que se funde. 

L’adición de chelo a las cheleras se clama acumulación mientres que a perda se clama ablación. A diferencia entre istas ye lo que clamamos Balanz de Masas mientres que a linia de equilibrio marca a muga entre os puestos do la nieu acumula y do se regala. Que una chelera avance u retacule pende de iste balanz entre acumulación y ablación, si ye positivo o frent d’a chelera avanza, si ye negativo o frent retacula. Allora bi ha dos zonas visibles quan remata l’estiu separadas por a línea de equilibrio. O puesto d’acumulación, do la nieu d’o zaguer anyo agún cubre a chelera, y o puesto d’ablación, do lo chelo y a nieu biella ye más exposada dau a que a nieu d’o zaguer hiebierno se ha iu. 

As zonas de acumulación se troban en cotas altas, do las temperaturas no gosan de puyar guaire y as precipitacions en forma de nieu son más grans. Mientres a chelera avanza y baixa por as montanyas troba puestos do puyan as temperaturas y as plevias de vez que baixan as precipitacions en forma de nieu. Arriba un punto en que a chelera no ye estable y a perda de chelo fa que se escrevace y colapse, astí, en o cobaixo, ye do trobamos os frents d’as cheleras. 

En os Pirineus a evolución d’as cheleras más que más ye dada a los cambeos de estacions. Mientres l’hibierno y a primavera acumula nieu en a superficie. Parte d’ista nieu pasa a puyar a masa d’a chelera quan transforma a chelo glacial. Entre que atra proteche a superficie chelada d’a insolación y d´a plevia mientres l’estiu y l’agüerro. Mientres l’estiu y l’agüerro as altas temperaturas y as precipitacions en forma de plevia fan que parte d’iste chelo se regale. 

Que pasa con as cheleras d’os Pirineus?

En a zaguera gran glaciación, la conoixida Glaciación de Würm, os Pirineus yeran cubiertos de chelo, pero pareixe que iste chelo arribó a desapareixer de raso mientres tiempos más recients de l’Holoceno (os zagueros 11000 anyos). Allora pa entender as actuals cheleras d’os Pirineus bi ha que fer-se ta lo zaguer periodo fredo d’a historia global, la clamada Chicota Edat de Chelo (Little Ice Age en anglés), que tenió lugar entre 1550 y 1850. Diferents treballos han concluiu que mientres la Chicota Edat de Chelo en os Pirineus as cheleras naixioron y creixioron dica ocupar más de 2000 ha. Ista superficie prencipió a decayer dimpues de 1850, con o fin d’ixe fredo periodo. 

Ista baixada d’a superficie de chelo glacial ha estau especialment gran arrivaus a lo sieglo XX con o creiximiento d’as sociedatz modernas y a suya industralización. Dende finals  d´o Sieglo XIX dica 1980 despareixioron arredol de 94 cheleras. Plegaus en ixos anyos dica hue día ista tendencia no ha feito que empiorar. Dau l’actual Calentamiento Global, dadas as  puyadas d’as temperaturas y a baixada d’as precipitacions en forma de nieu y dada la esparixion d’as estaciones intermedias (Agüerro y Primavera) que fa que as altas temperaturas de l’estiu prencipien antes (en mayo iste 2017) y rematen más tarde (en otubre iste anyo), as cheleras pirenencas se troban en un momento critico. A isto se suma que istas cheleras no son guaire grans, como puedan estar-lo las que bi’n ha en os Alpes u en atras cordeleras. A distancia entre os frents y os tozuelos d’as cheleras no ye guaire y a línea de equilibrio ye puyando rebaixando-se a zona de acumulación y enamplandose a zona de ablación. Ye por ixo que muitas d’istas cheleras son prencipiando a escrevazar-se y a colapsar-se no nomás por os frents y as zonas baixas sino tamién por as zonas centrals y zonas altas. 

Todas as cheleras chicotas ya han desapareixiu y as grans son desapareixendo a tot estrús. Somos fablando de que en l’actualidat no bi ha que 242,06 ha de cheleras en o Pirineu. Ha baixau un 88,25% a superficie d´as cheleras dende 1850 dica hue día. 

Cheleras como claus pa estudiar o Cambeo Climatico

As cheleras pirenancas responden ascape a cambeos climaticos dau a la suya latitud, a la influencia mediterranesa y a lo suyo chicot tamanyo. Lo mesmo que avanzoron mientres a Chicota Edat de Chelo en un curto periodo de tiempo, retaculan y desapareixen más rapedo agún dau l’actual Cambeo Global. Son cuerpos chelaus extremadament sensibles a la puyada de temperaturas y a la baixada d’as precipitacions como nieu. Ye por ixo que muitos científicos afirmamos que as nuestras cheleras desapareixeranen as venients decadas. 

Cal dicir que a existencia de cheleras en os Pirineus, en un puesto do fan muga os ambients atlánticos con os mediterráneos, ye una anomalía historica y climatica. Son as cheleras más meridionals de Europa antimás d’as solas presents en un ambient con gran influencia mediterránea. Allora pareixe que ye de dar que istas cheleras  desapareixcan, y ye verdat que ista estaría a suya dinamica natural. Manimenos cal entender que l’actual desapareixion tant rapeda d’as cheleras d’os Pirineus ye un espiello d’a situación actual de Cambeo Climatico que somos chenerando os humanos con a nuestra actividat. O problema no ye nomás l’acotole d´as cheleras, ye a rapidez con la que se son acotolando. As cheleras son claus pa la deteccion d’o Cambeo Global d’o que venimos alertando dende a comunidat cientifica dende fa decadas. Ye por ixo que l’estudio y os treballos feitos pa conoixer como evolucionan ye muito important pa conoixer os efectos y l’amplitud d’o Cambeo Global en os ambients de montanya y as suyas redoladas. 

Si i has trobau errors d’escritura u gramaticals, por favor notifica-nos-lo seleccionando o texto y pretando Ctrl+Enter.